Буряад угсаатанай хатарай заншал һэргээхэ талаар энэ хэмжээн үнгэргэгдэнэ гэжэ эмхидхэгшэд мэдүүлнэ.
Түсэл хэдэн шатаһаа бүридэнэ. Урид шэнжэлгын ажал хэгдэхэ, аймагуудай нютаг нугануудаар мэргэжэлтэд ябажа, урданай заншалнуудтай танилсажа, видео-буулгабаринууд бэлдэгдэхэ. Хатарай шэнэ хүгжэмтэ композицинууд, дуу хатарай зүжэглэмэл үйлэ хэрэгүүд бүтээгдэхэ. Мүн арад зоной хуушанай заншалта хубсаһа хунарай согсолбори хэблэгдэхэ. Тэндэ хубсаһанай хэб оруулагдахаар хараалагдана.
Аман зохёол шэнжэлгын экспедицинүүд эхилэнхэй. Зэдын болон Сэлэнгын аймагуудаар бүлэг шэнжэлэгшэд һаяхана ябаһан байна. «Улаалзай», «Цагаатайн гол», «Гуламта», «Агсуурга» болон бусад ансамбльнуудтай уулзалга эмхидхэгдэжэ, урданай дуунай абяанууд, хатар нааданууд бэшэгдэжэ абтаа. Хэмжээндэ хабаадагшад урданай гэрэл зурагуудаар хубаалдаа.
Шэнжэлэгшэд Хэжэнгын аймагай Могсохон һуурин хүрэһэн байна. Арадай аман зохёолой «Мүнхэ гэрэл» ансамбль һонирхолтой зүжэглэмэл наада харуулаа.
«Хэзээб даа, Тэр болон Энги хоёр залуушуул бэе бэедээ дуратай байһан юм гэжэ хэлсэдэг. Теэд дайлалдадаг отог обогой үхибүүд байгаа. Тиигэжэ тэдэ гэрһээ тэрьедэжэ, хада дээрэһээ хоюулаа унаһан түүхэтэй. Тиигэжэ унаһан газартань тэрэнги сэсэгүүд элбэгээр ургаһан гээшэ. Эгээл иимэ түүхэ домогууд маанадые һонирхуулна», - гэжэ эмхидхэгшэд мэдүүлнэ.
